Ki tikè ki nan men w ?

An Ayiti, nou gen yon fraz nou renmen repete ki se : "Dire lavi yon Ayisyen se 24 è renouvlab." Malerezman, se yon tris verite paske nou ap viv nan yon sitiyasyon kote w ap soti men ou pa konnen si w ap antre, ou lakay ou, ou panse w an sekirite, san w pa konnen ke sa ka dènye moman w sou tè a avan yon bal mawon pase pran w.

Mwen sonje yon dimanch maten nan yon sèvis legliz, pastè a te poze yon kesyon kote li te mande asanble a: “Si twonpèt la ta sonnen kounye a, pami ki moun w ap ye? Èske w ap pami sa k ap rete yo, oubyen pami sa k ap prale yo ?” Anplis de kesyon sa a, mwen gen yon lòt kesyon ke sitiyasyon nap viv la fè mwen poze tèt mwen e ke mwen ta renmen nou poze tèt nou tou: “Si dire lavi m se 24 è renouvlab, si yon bagay ta rive m kounye a, ki kote mwen prale ? ”

Gen anpil kesyon ki ap chèche konnen kisa ki genyen apre lanmò, èske gen yon lavi apre lanmò ? Gen anpil eksperyans, teyori ak temwayaj ki vini pou reponn ak kesyon sa a. Men kisa Labib di nan sa ! Gen anpil pasaj nan Bib la ki pale de lanmò, men pasaj ke n ap gade a nan Lik 16 :19-31. Nan pasaj sa a, li pale de yon nonm ki te rich ak Laza ki te pòv anpil, ki t ap viv devan pòtay nonm rich la e ki te gen anpil malenng sou li. Lè lanmò rive pou tou de mesye yo, li ekri ke zanj Bondye pote Laza nan syèl la kote Abraram. Vèsyon fransè a pale de “le sein d’Abraham”. Epi nonm rich la li menm ale kote mò yo ye nan mitan soufrans, ki se “le séjour des morts” nan vèsyon fransè a. Pasaj la kontinye esplike kijan nonm rich la t ap soufri kote li ye a e li mande pitye pou Laza tranpe bout dwèt li nan yon ti dlo pou mete yon ti fraîcheur sou lang li. Men gen yon gwo twou ki separe yo. Pasaj sa a montre nou ke pandan nonm rich la t ap byen pase pandan li te vivan, e Laza t ap mal mennen, apre lanmò yo, nou wè kijan nonm rich la ap soufri e kijan Laza ap jwi konsolasyon pa l.

Yon moun konpoze de 3 pati : kò fizik li, lespri l, ak nanm li. Jou lanmò l, kò li ap rete sou tè a pou dekonpoze e tounen pousyè, lespri li ap tounen kot Bondye, men nanm li ap rete pou viv etènèlman. Si w ap swiv istwa Laza ak nonm rich la, ki kote ou ap anvi nanm ou al pase tan an pandan w ap tann rezireksyon ak jijman final la ? Se vre ke aprè lanmò nou tout gen pou nou jije, men se pa imedyatman lè w fin mouri ke jijman an pral fèt. Nan Jan 5 :29, li ekri ke tout moun ki te fè sa ki byen pral leve pou resevwa lavi ki pap janm fini, men tout moun ki te fè sa ki mal pral leve pou resevwa kondanasyon yo. Se apre rezireksyon ak jijman sa a ou pral pase etènite w ak Bondye, oubyen nan lanfè ak Satan kote ou pral soufri pou toutan.

Si yon bagay ta rive m kounye a, ki kote mwen prale? Kisa k ap tann mwen apre lanmò ?

Èske mwen se yon moun ki sove ? Se kesyon sa yo mwen ta renmen ou menm ki ap li tèks sa a poze tèt ou. Èske w ap tann li twò ta pou dekouvri sa ? Kisa ki anpeche w reponn ak kesyon sa yo? Mwen pèsonèlman konnen kote mwen prale deja; mwen konnen ki tikè ki nan men m. E ou, ki tikè ki nan men w ?

Kòman mwen fè konnen kote mwen prale ?

Li senp. Jan 14 :6 di : “Se mwen menm ki chemen an, se mwen menm ki verite a, se mwen menm ki lavi a. Pèsonn paka al jwenn Papa a si li pa pase nan mwen.” Pa gen wout pa bwa; se yon sèl chemen an ki genyen ki pa lòt ke Jezi.

Sa pa pwouve kijan mwen fè konnen ki tikè mwen gen nan men m, mwen dakò ak sa. Tikè mwen gen nan men m nan se yon tikè ke mwen pa merite, se tikè lagras. Èske nou konnen kisa ki yon gras prezidansyèl? Yon gras prezidansyèl se yon opòtinite yon prezidan bay yon moun kote li padone e efase tout move zak moun nan te fè. Sa pèmèt moun nan soti san okenn move akizasyon sou do l tankou yon inosan. Yon gras pa yon kado. Lè w jwenn yon kado, se paske ou merite l. Men gras la, ou pa merite l paske ou pa fè anyen pou sa.

Efezyen 2 :8-9 di : “Paske se pa lagras ke li sove nou, pa mwayen lafwa. Sa pa soti nan nou menm, se yon kado Bondye bannou. Non, nou pa fè anyen pou sa. Konsa, pèsonn pa ka vante tèt yo.” Mwen menm, mwen pa jwenn yon gras prezidansyèl; gras pa m nan soti nan syèl. Se yon gras diven ke li ye. Mwen pa merite l paske mwen se yon pechè. Men Bondye, nan lanmou li, pèmèt mwen jwenn gras sa ki lave m de peche m yo.

Kijan mwen fè konnen ke mwen jwenn gras sa ?

Nan Jan 3 :16, li di : “Paske Bondye sitèlman renmen lèzòm li bay sèl Pitit li a pou yo. Tout moun ki va mete konfyans yo nan li pap pèdi lavi yo. Okontrè, y ap gen lavi ki pap janm fini an.”

Kijan ou ka mete konfyans ou nan li ?

Li pa lòt fason ke rekonèt ke li te vin viv yon vi san peche pou ou. Li te kloure sou lakwa pou peche w yo, e li te resisite twa (3) jou apre pou ba ou lavi ki pap janm fini an.

Kisa sa vle di ?

Sa vle di ke pa gen anyen, okenn zèv ou ka fè ki ka pèmèt ou sove. Se sèlman lè w kwè nan sakrifis Jezi te fè pou ou sou lakwa, kote li netwaye w de peche w yo, e li ba ou lavi san peche li a. Se lè sa a ou vin pitit Bondye. E sa pap koute w anyen. Gras Bondye gratis. Li deja la pou ou. Se ou menm ki pou ouvri kè w pou aksepte l, pou l vin chanje lavi w e ba w tikè lavi ki pap janm fini an.

Ou gen tikè lagras pa w la déjà ?

Kisa w ap tann pou al pran l ? Li pap koute w anyen pou genyen l. Pa kite se lè tren lanmò a rive pou w regrèt ke w pa t gentan chanje tikè paske pa gen tounen dèyè.

E si mwen twonpe m e pa gen anyen nan tout sa yo vre ?

Preferab ou gen asirans ou nan men w, epi pa gen anyen, ke ou pa genyen l ditou pou ou jwenn nan move bò a. Ou pap pèdi anyen si w genyen l. Men si w pa genyen l, epi pou se aprè ou regrèt, w ap di : “Si m te konnen…”